بەدەستهێنانی ددانێکی سپی شوشەیی شتێکی زۆر گران نیە بەڵام پێویستە لە هەندێک خوو دوربکەوینەوە کە بەدرێژایی کات دەبیتە هۆی توشبوون بە سەرئێشە یان دانئێشە بۆت .
دوو دکتۆری ددان بە ناوەکانی ئالیس لی و ئاڵێسن نیوگارد لە زانکۆی کۆڵۆمبیای زانسی ددانسازی کۆمەڵێک ئامۆژگاری بۆ خستووینەتە ڕوو کە لە هەڵە باوەکانی پاککردنەوە یان جوانکردنی ددان دوورماندەخاتەوە.
١- بەجێهێنانی کارێکی دیکە لەگەڵ ددان شتنەکەدا
پێویستە لە کاتی ددان شتندا سەرنجی تەواوت لەسەر شۆردنی دانەکەببێت و کاتی تەرخانکراوت بۆ دانابێت، باشترە بەیانیان لەبەردەم ئاوێنەو مەخسەلەیەکدا ددان بشۆیت.
٢-زۆرشتنی فڵچەی دان
هیچ کەسێک بەهۆی تەواو پاکنەکردنەوەی فڵچەی ددانەوە توشی نەخۆشی نەبووە ، پێویست ناکات بۆ پاکردنەوە فڵچەی دانەکەت بخەیتە مایکرۆوەیڤ یان ناو قاپشۆرەکەت ، تەنها شۆردن بە ئاو و دانانی بۆ وشکردنەوە بەسە .
٣-گوێ لە ئامۆژگاری تۆڕە کۆمەڵایەتیەکان مەگرە
تۆڕە کۆمەڵایەتیەکان و ماڵپەرەکان پریەتی لە ئامۆژگاری لەسەر چۆنیەتی پاکردنەوەو سپیکردنەوەی ددان، بۆ بەدەستهێنانی زانیاری دروست سەردانی دکتۆری دانەکەت بکە.
٤-تیشکی ئێکس
توێژینەوەکان دەریانخستووە بەکارهێنانی ئەو تیشکە ئێکسانەی بۆ سپیکردنەوەی ددان دانراون مرۆڤ توشی نەخۆشی شێرپەنجە ناکات بەڵام ئەگەر کێشە لە ئامێری تیشکە ئێکسەکەدا هەبێت و تیشکێکی بەهێزتر بگەیەنێت بۆ تەندروستی مرۆڤ مەترسیدارە.
٥-فڵچەکەت بە تەڕی مەخەرە ناو جانتای گەشتەکەتەوە
فڵچەی تەڕ بەکتریا هەڵدەمژیت ، هەوڵبدە فڵچەکەت داپۆشراو و وشکبێت کاتێک دەیخەیتە جانتای گەشتەکەتەوە.
٦- خواردنەوەی سرکەی سێو
بڕی ترشی ناو سرکەی سێو زیانێکی زۆر بە ڕوپۆشی دانەکەت دەگەیەنێت.
٧-پشتگوێخستنی ڕاستکەرەوەی ددانەکەت
ئەو کەسانەی کە ڕاستکەرەوە یان پردی ددان بۆ ڕێککردنەوەی ددانەکانیان بەکاردەهێنن پێویستە بە بێ داوای دکتۆرەکانیان ڕاستکەرەوەکانیان پستگوی نەخەن .
٨-ددانشتن لەدوای خواردنەوەی ترشەمەنیەکان
ئەگەر تۆ لەو کەسانەی کە بەیانیان شەربەتێکی لیمۆ یان پرتەقاڵی ترش دەخۆیتەوە ، بۆ پاراستنی ڕوپۆشی ددانەکەت لە ڕاماڵین، لە پێشدا ئاوێک بە دەمت وەربە ئینجا دەست بە ددانشتن بکە.
٩-ددان جیڕکردنەوە
دانجیڕکردنەوە یەکێکە لەو خووانەی کە هەندێک لە ئێمە هەیەتی ، ئەم خووە زیانی بۆ شەویلگەکانی ددان و سەر ئێشەو شکاندنی ددان هەیە.
١٠-جگەرەکێشان
جگەرەکێشان مرۆڤ توشی نەخۆشیەکانی پوک دەکات ، لەوانەش توانەوە پوک و لەدەستدانی ئێسقانی ددان و کەوتنی ددان.
١١-چیلکەی ددان
چیلکەی ددان باریک و لاوازە ئەگەری هەیە لەناو دەمتدا بشکێت و پوکت برینداربکات.
١٢-سەردانیکردنی بەردەوامی دکتۆری ددانەکەت
جگە لە سەردانیکردنی دکتۆری ددان لە کاتە پێویستەکاندا ، پێویستە شەش مانگ جارێک بۆ پشکنین و ئاگاداربوون لە هەر کێشەیەکی نوێ سەردانی دکتۆری ددانەکەت بکەیت.
١٣-زۆر سپیکردنەوەی ددان
زۆر سپیکردنەوەی ددانەکانت ڕوپۆشی ددانەکەت لاوازدەکات و توشی هەستیاری ددانت دەکات.
١٤-نەخواردنەوەی ئاوی پیویست
لە ناو ئاوی هەندێک لە ئاوە پاکژکراوەکانی بوتڵەکاندا یان هەندێک جۆری هەویری دداندا ماددەی فلۆراید هەیە کە سوودی بۆ بەهێزکردنی ددانەکانت هەیە.
١٥-پشتگوێخستنی کالیسیۆم وڤیتامین D
خواردنی بڕی پێویستی کالیسیۆم و ڤیتامین D سوودی بۆ بەهێزکردنی ددان و ئێسقان هەیە ، دەتواندرێت لە ڕێگەی ئەو خواردنانەی کە لە پیکهاتەکەیدا بوونیان هەیە یان لەڕێگەی حەبەوە بەدەستبهێندرێن.
١٦- خواردنەوەی شەربەت
شەربەت سەرەڕای بوونی ڤیتامین و پێکهاتە خۆراکیە بەسوودەکانی دیکە تیایدا ، بڕێکی زۆری جۆرەکانی شەکر لەخۆیدەگرێت کە شەکر بە دوژمنی یەکەمی ددان دادەنرێت ، باشترە لەدوای خواردنەوەی شەربەت ددانەکانت بە ئاو بشۆیت.
١٧-بەکارهێنانی فڵچەی ڕەق
بەکارهێنانی فڵچەیەکی ددانی ڕەق زیان بە ڕووپۆشی ددان دەگەیەنیت.
١٨-بەکارهێنانی دەرمانێکی غەرغەرەی نەگونجاو
دەبێت لە هەڵبژاردنی جۆری دەرمانێک بۆ شتنی ناو دەم و غەرغەرەکردندا هۆشیاربین ، ئەو دەرمانانەی کە دژەبەکتریاو فلۆرایدیان تێدایە ددان لە کلۆربوون و بۆنی ناوخۆسی دەم و هەڵئاوسانی پوک دورتدەخاتەوە.
١٩-خواردنەوە گازیەکان
سەرجەم خواردنەوە گازیەکان بە کەم شەکرەکانیشیەوە ددانەکان توشی ڕاماڵین دەکات، هەوڵبدە خۆتیان لێبەدووربگریت.
٢٠-سمینی زمان و لێو
ئەگەر تۆ یەکێکی لەو کەسانەی لێو یان زمانت سمیوە ئاگاداری خۆتبە گاز لە ئەڵقەکەی ناو دەمت نەگریت و توشی شکاندنی ددانەکانتیت، ڕەنگە هەندێک جار لە کاتی سمینەکەشدا زمان و پوکت برینداربکات .
ئا: ساکار سەدرەدین - مۆنیتەرینگ
NRT وةركيراوة لة
NRT وةركيراوة لة
No comments: